ഈ നോവൽ തുടക്കം മുതൽ വായിക്കാൻ ഇവിടെ ക്ലിക്ക് ചെയ്യുക...
സിറ്റിങ്ങ് റൂമിലെ മേശയ്ക്കരികിൽ തന്റെ വീൽ ചെയറിൽ ഇരിക്കുന്ന ജെറാർഡ് ക്രെസ്സൺ ഗ്ലാസ്സുകളിൽ വീണ്ടും റെഡ് വൈൻ നിറച്ചു. "നിങ്ങളുടെ മിഥ്യാധാരണകളെ തിരുത്താനൊന്നും എനിക്ക് താല്പര്യമില്ല..." അയാൾ സാറയോട് പറഞ്ഞു. "ഫ്രാൻസിലെയും യൂറോപ്പിലെ മറ്റ് ഏത് അധിനിവേശ രാഷ്ട്രങ്ങളിലെയും എന്ന പോലെ ജെഴ്സിയിലും യഥാർത്ഥ ശത്രുക്കൾ ഇൻഫോർമർമാരാണ്... അവർ ഇല്ലാതെ ഗെസ്റ്റപ്പോയ്ക്ക് എവിടെയും പ്രവർത്തിക്കുക അസാദ്ധ്യം..."
"പക്ഷേ, ഞാൻ കേട്ടത് ജെഴ്സിയിൽ ഗെസ്റ്റപ്പോയുടെ സാന്നിദ്ധ്യം ഇല്ലെന്നാണല്ലോ..." സാറ പറഞ്ഞു.
"ഗെഹൈമെ ഫെൽഡ്പൊലീസൈ എന്നൊരു സംവിധാനമാണ്‌ ഔദ്യോഗികമായി അവിടെ പ്രവർത്തിക്കുന്നത്... എന്ന് വച്ചാൽ സീക്രട്ട് ഫീൽഡ് പോലീസ്... ജർമ്മൻ മിലിട്ടറി ഇന്റലിജൻസ് ആയ അബ്ഫെറിന്റെ നിയന്ത്രണത്തിലാണെന്നാണ് വയ്പ്പ്... എല്ലാം ജനങ്ങളുടെ കണ്ണിൽ പൊടിയിടാനുള്ള ഒരു തന്ത്രം... പിന്നെ, ഒരു ബ്രിട്ടീഷുകാരി എന്ന നിലയിൽ നിങ്ങളെ അവർ ബുദ്ധിമുട്ടിക്കുമെന്ന് കരുതുന്നുമില്ല..." അയാൾ ചിരിച്ചു.
"മണ്ടത്തരം..." കിച്ചണിൽ നിന്ന് കോഫിയുമായി എത്തിയ സോഫി പറഞ്ഞു. "ജെഴ്സിയിൽ സീക്രട്ട് ഫീൽഡ് പോലീസിൽ ജോലി ചെയ്യുന്നവരിൽ അധികവും ഗെസ്റ്റപ്പോയ്ക്ക് വേണ്ടിയാണ് പ്രവർത്തിക്കുന്നത്..."
"അവർ എവിടെയാണ് തങ്ങിയിരിക്കുന്നത് എന്നറിയുമോ...?" സാറ ആരാഞ്ഞു.
"ഹാവിയർ ഡി പാസിലുള്ള സിൽവർടൈഡ് ഹോട്ടലിൽ... ആ സ്ഥലം പരിചയമുണ്ടോ...?"
"ഓ യെസ്..." അവൾ തല കുലുക്കി. "കൊച്ചു കുട്ടി ആയിരിക്കുമ്പോൾ ഞാൻ ഹാവിയർ ഡി പാസിൽ നീന്താൻ പോകുമായിരുന്നു..."
"ഗെസ്റ്റപ്പോ, സീക്രട്ട് ഫീൽഡ് പോലീസ്, SD, അബ്ഫെർ... എവിടെ ആയിരുന്നാലും ശരി, അപ്രതീക്ഷിതമായി വാതിൽക്കൽ മുട്ട് കേൾക്കുകയാണെങ്കിൽ, ഒരുവൻ അറസ്റ്റ് ചെയ്യപ്പെടുകയാണെങ്കിൽ, ആ പാവത്താനെ സംബന്ധിച്ചിടത്തോളം അത് ഗെസ്റ്റപ്പോ തന്നെയാണ്..." മാർട്ടിനോ പറഞ്ഞു.
"അതെ... അതു തന്നെയാണ് ജെഴ്സിയിലെയും അവസ്ഥ..." ജെറാർഡ് പറഞ്ഞു. "പ്രദേശവാസികളുടെ കണ്ണിൽ അവർ ഗെസ്റ്റപ്പോകളാണ്... ലിയോൺസിലും പാരീസിലും ഒക്കെ നടക്കുന്നതുമായി താരതമ്യം ചെയ്താൽ ഇതൊരു മിക്കി-മൗസ് കളി മാത്രമാണ്... പക്ഷേ, ഒരു ക്യാപ്റ്റൻ മുള്ളർ ഉണ്ട്... താൽക്കാലിക കമാൻഡ് ഇൻ ചാർജ്... അയാളെ ഒന്ന് കരുതിയിരിക്കുന്നത് നന്നായിരിക്കും... ഒപ്പം അയാളുടെ മുഖ്യ സഹായി ആയ ഇൻസ്പെക്ടർ ക്ലൈസ്റ്റിനെയും..."
"SS സേനാംഗങ്ങളാണോ അവർ...?"
"അതെനിക്കറിയില്ല... ഒരു പക്ഷേ അല്ലായിരിക്കാം... അവരെ ഒരിക്കലും യൂണിഫോമിൽ കാണാറില്ല... ഏതെങ്കിലും വൻനഗരത്തിലെ പോലീസ് ടീമിന്റെ സഹായികളാകാം... മൊത്തം ഇത്തരം ആൾക്കാരാണ്... തങ്ങളുടെ കഴിവ് തെളിയിച്ച് സ്ഥാനലബ്ധിയ്ക്കായി ഇറങ്ങിയിരിക്കുന്നവർ..." അയാൾ ചുമൽ വെട്ടിച്ചു. "ഗെസ്റ്റപ്പോയിൽ പ്രവർത്തിക്കാൻ നിങ്ങൾ ഒരു SS ഭടൻ ആകണമെന്നില്ല... എന്തിന്, ഒരു നാസി പാർട്ടി പ്രവർത്തകൻ പോലും ആകണമെന്നില്ല..."
"സത്യം..." മാർട്ടിനോ പറഞ്ഞു. "അതെന്തിങ്കിലുമാകട്ടെ, ജെഴ്സിയിൽ നിന്നും കെൽസോയെ പുറത്തെത്തിക്കുവാനുള്ള ഞങ്ങളുടെ ശ്രമത്തെ നിങ്ങൾ എങ്ങനെ വിലയിരുത്തുന്നു...?"
"തീർച്ചയായും എളുപ്പമല്ല തന്നെ... പൊതുജനങ്ങളുടെ യാത്രയ്ക്ക് കർശന നിയന്ത്രണമാണ് അവർ ഏർപ്പെടുത്തിയിരിക്കുന്നത്... ഒരു ചെറു ബോട്ടിൽ പുറത്തു കടക്കുക എന്നത് ഈ അവസരത്തിൽ തീർത്തും അസാദ്ധ്യമായിരിക്കും..."
"പ്രത്യേകിച്ചും, നടക്കാൻ കഴിയാത്ത അവസ്ഥയിലുമാണ്‌ അദ്ദേഹമെങ്കിൽ......" സോഫി ചുമൽ വെട്ടിച്ചു.
"ഏതു നിമിഷവും നിങ്ങളുടെ ഫോൺ കോളിനായി SOE യിൽ ഈ വാരാന്ത്യത്തിൽ അവർ കാത്തു നിൽക്കുന്നുണ്ടാകും..." മാർട്ടിനോ പറഞ്ഞു. "പിക്ക് ചെയ്യാനായി ഞായറാഴ്ച്ച രാത്രിയിൽ ലൈസാൻഡർ അയക്കാനാണ്‌ പ്ലാൻ..."
പെട്ടെന്ന് ജെറാർഡ് പൊട്ടിച്ചിരിച്ചു. "എന്റെ മനസ്സിൽ ഒരു ഐഡിയ... നിങ്ങൾ ഒരു SS ഉദ്യോഗസ്ഥൻ ആണെന്നാണല്ലോ വയ്പ്പ്... എപ്പോൾ വേണമെങ്കിലും കെൽസോയെ അറസ്റ്റ് ചെയ്യാം നിങ്ങൾക്ക്... അങ്ങനെയാകുമ്പോൾ അദ്ദേഹത്തെ കണ്ടു പിടിക്കുക, അറസ്റ്റ് ചെയ്യുക... ഞാൻ പറയുന്നത് മനസ്സിലാവുന്നുണ്ടോ...? എന്നിട്ട് അദ്ദേഹത്തെ ഔദ്യോഗികമായിത്തന്നെ ഇവിടെയെത്തിക്കുക... പിന്നെ എളുപ്പമല്ലേ...?"
"വളരെ നല്ല ആശയം..." സാറ പറഞ്ഞു. "പക്ഷേ, ഹെലൻ ആന്റിയെയും ജനറലിനെയും എന്തു ചെയ്യും...? അവരെയും അറസ്റ്റ് ചെയ്യേണ്ടി വരില്ലേ...?"
മാർട്ടിനോ തല കുലുക്കി. "ആശയം നല്ലത് തന്നെ... സാരമില്ല, വേറെന്തെങ്കിലും മാർഗ്ഗമുണ്ടോ എന്ന് അവിടെയെത്തിയിട്ട് ഞങ്ങൾ നോക്കട്ടെ..."
"അല്ലെങ്കിൽ പിന്നെ ഒരു വെടിയുണ്ട കൊണ്ട് കാര്യം അവസാനിപ്പിക്കുക..." ജെറാർഡ് പറഞ്ഞു. "അവർ പറയുന്നത് പോലെ അത്രയ്ക്കും ഗൗരവതരമാണ്‌ കാര്യങ്ങളെങ്കിൽ എന്നാണ് ഞാൻ ഉദ്ദേശിച്ചത്..."
"രക്ഷപെടാനുള്ള ഒരു അവസരത്തിന് അർഹനാണ് അദ്ദേഹവും..." മാർട്ടിനോ പറഞ്ഞു. "എന്തെങ്കിലും മാർഗ്ഗമുണ്ടെങ്കിൽ അദ്ദേഹത്തെ ഞാൻ പുറത്തെത്തിച്ചിരിക്കും... അതല്ലെങ്കിൽ പിന്നെ........" മാർട്ടിനോ ചുമൽ വെട്ടിച്ചു. "ഇന്ന് രാത്രി തന്നെ ജെഴ്സിയിലേക്ക് പുറപ്പെടണം... സീറ്റ് ബുക്ക് ചെയ്യുന്നതിനുള്ള നടപടികൾ എന്തൊക്കെയാണ്...?"
"മൂവിങ്ങ് ഓഫീസറുടെ ഓഫീസ് ഹാർബറിൽത്തന്നെയാണ്... അയാളാണ്‌ പാസ്സ് ഇഷ്യൂ ചെയ്യുന്നത്... നിങ്ങളുടെ കാര്യത്തിൽ യാതൊരു ബുദ്ധിമുട്ടും ഉണ്ടാകില്ല..."
"ഗുഡ്..." മാർട്ടിനോ പറഞ്ഞു. "അപ്പോൾ അതിന്റെ കാര്യത്തിലും തീരുമാനമായി..."
സോഫി നാലു ഗ്ലാസ്സുകളിൽ റെഡ് വൈൻ നിറച്ചു. "ഞാൻ നിങ്ങൾക്ക് ആശംസകളൊന്നും നേരാൻ പോകുന്നില്ല... ഒരു കാര്യം മാത്രം പറയാം..."
"എന്താണത്...?" മാർട്ടിനോ ചോദിച്ചു.
അവൾ സാറയുടെ ചുമലിൽ കൈയ്യിട്ട് തന്നോട് ചേർത്തു നിർത്തി. "ഈ കുട്ടിയെ എനിക്ക് വല്ലാതങ്ങ് ഇഷ്ടമായി... അവിടെ എന്തു തന്നെ സംഭവിച്ചാലും ഇവളെ ജീവനോടെ തിരിച്ചെത്തിക്കണം... ഇവളെക്കൂടാതെയെങ്ങാനും നിങ്ങൾ ഇവിടെ തിരിച്ചെത്തിയാൽ, ഞാനായിരിക്കും നിങ്ങളുടെ തലയ്ക്കകത്തു കൂടി വെടിയുണ്ട പായിക്കുന്നത്... പറഞ്ഞില്ലെന്ന് വേണ്ട..."
പുഞ്ചിരിച്ചു കൊണ്ട് ഗ്ലാസ് ഉയർത്തി അവൾ അദ്ദേഹത്തിന് ചിയേഴ്സ് പറഞ്ഞു.
(തുടരും)
അടുത്ത ലക്കത്തിന് ഇവിടെ ക്ലിക്ക് ചെയ്യുക...
