ഈ നോവൽ തുടക്കം മുതൽ വായിക്കാൻ ഇവിടെ ക്ലിക്ക് ചെയ്യുക...
റോഡ് മുറിച്ചു കടന്ന് മാർട്ടിനോ ടൗൺ ഹാളിന് നേർക്ക് നടന്നു. ഹാളിലേക്കുള്ള പടവുകളിൽ പാറാവുകാരനുമായി സംസാരിച്ചുകൊ‌ണ്ട് പരമ്പരാഗത ബ്രിട്ടീഷ് ബോബി യൂണിഫോം അണിഞ്ഞ ഒരു പോലീസുകാരൻ നിൽക്കുന്നുണ്ടായിരുന്നു. മാർട്ടിനോ അങ്ങോട്ട് നടന്നടുക്കുന്നത് കണ്ട് സംസാരം നിർത്തിയ അവർ തെല്ലു കരുതലോടെ അദ്ദേഹത്തെ വീക്ഷിച്ചു.
"ഞാൻ സ്റ്റാൻഡർടൻഫ്യൂറർ ഫോഗെൽ... കമാൻഡറെ കാണാൻ വന്നതാണ്..." മാർട്ടിനോ പറഞ്ഞു.
പാറാവുകാരൻ ഞൊടിയിടയിൽ കാലുകൾ അമർത്തിച്ചവിട്ടി അറ്റൻഷനായി നിന്നു. പോലീസ് കോൺസ്റ്റബിൾ പതുക്കെ സ്ഥലം കാലിയാക്കി. "കമാൻഡർ പത്തു മിനിറ്റ് മുമ്പ് എത്തിയിട്ടുണ്ട്, സ്റ്റാൻഡർടൻഫ്യൂറർ..."
മാർട്ടിനോ ഹാളിനുള്ളിലേക്ക് കടന്നു. കവാടത്തിനരികിലെ മേശയ്ക്കരികിൽ ഇരിക്കുന്ന ആർമി സെർജന്റ് തലയുയർത്തി നോക്കി. "എന്റെ പേര് ഫോഗെൽ... കേണൽ ഹെയ്നുമായി ഒരു മീറ്റിങ്ങ് ഉണ്ട്..."
ചാടിയെഴുന്നേറ്റ സെർജന്റ് ഫോൺ റിസീവർ എടുത്തു. "സ്റ്റാൻഡർടൻഫ്യൂറർ ഫോഗെൽ എത്തിയിരിക്കുന്നു, ഹെർ മേജർ..." അയാൾ റിസീവർ താഴെ വച്ചു. "താങ്കളെ കൂട്ടിക്കൊണ്ടു പോകാൻ മേജർ നെക്കർ ഉടൻ താഴെയെത്തും സർ..."
"നന്ദി..." തിരിഞ്ഞ് അല്പം മാറി നിന്ന്, തുറന്നു കിടന്ന വാതിലിലൂടെ മാർട്ടിനോ പുറത്തേക്ക് നോക്കി. നിമിഷങ്ങൾക്കകം ആരോ സ്റ്റെയർകെയ്സിന്റെ പടികളിറങ്ങി താഴേക്ക് വരുന്ന ശബ്ദം കേൾക്കാറായി. തിരിഞ്ഞു നോക്കിയ അദ്ദേഹം കണ്ടത് തിടുക്കത്തിൽ താഴേക്ക് വരുന്ന ചെറുപ്പക്കാരനായ ഒരു ഇൻഫന്ററി മേജറെയാണ്. ഏറിയാൽ മുപ്പത് വയസ്സ് തോന്നിക്കും.
അങ്ങേയറ്റം ബഹുമാനത്തോടെ ഒരു നിമിഷം കാലുകൾ അമർത്തിച്ചവിട്ടി അറ്റൻഷനായി നിന്ന് അയാൾ ഹസ്തദാനം നൽകി. "ഫെലിക്സ് നെക്കർ, സ്റ്റാൻഡർടൻഫ്യൂറർ..."
വലതു കണ്ണിനോട് ചേർന്നുള്ള മുറിപ്പാടിൽ നിന്നും അയാൾ യുദ്ധനിരയിൽ പൊരുതിയിട്ടുള്ളവനാണെന്ന് വ്യക്തം. അയാളുടെ യൂണിഫോമിലെ അയേൺ ക്രോസ് ഫസ്റ്റ് ക്ലാസ് ബാഡ്ജും സിൽവർ വൂണ്ടഡ് ബാഡ്ജും സൂചിപ്പിക്കുന്നത് ചുരുങ്ങിയത് മൂന്നു തവണയെങ്കിലും യുദ്ധനിരയിൽ പരിക്കേറ്റിട്ടുണ്ടെന്നാണ്. കൂടാതെ, നേരിട്ടുള്ള ഏറ്റുമുട്ടലിൽ ഭാഗഭാക്കായതിന്റെ ബഹുമതിയായി അസോൾട്ട് ബാഡ്ജും. ശത്രുരാജ്യത്തിന്റെ ഇത്തരം ബാഡ്ജുകളെക്കുറിച്ചുള്ള അറിവുകളൊക്കെയാണ് മാർട്ടിനോയെ ഈ രംഗത്ത് സജീവമായി നില നിർത്തുന്നത്. ഒരറിവും അദ്ദേഹം പാഴാക്കിയില്ല. അതു വച്ചു നോക്കിയാൽ ഒരു വാർ ഹീറോയാണ് തന്റെ മുന്നിൽ നിൽക്കുന്നത്.
"നിങ്ങളെ പരിചയപ്പെടാനായതിൽ വളരെ സന്തോഷം, ഹെർ മേജർ..." അദ്ദേഹം പറഞ്ഞു. "ജെഴ്സിയിൽ എത്തിയിട്ട് കുറേ നാളായോ നിങ്ങൾ...?"
"ഏതാനും മാസങ്ങൾ മാത്രം..." നെക്കർ പറഞ്ഞു. "വാസ്തവത്തിൽ മുന്നുറ്റിപ്പത്തൊമ്പതാം ഡിവിഷനിൽപ്പെട്ടയാളല്ല ഞാൻ... ഇതൊരു താൽക്കാലിക നിയമനമാണ്..."
സ്റ്റെയർകെയ്സ് കയറി അവർ മുകളിലെത്തി. വാതിലിൽ മുട്ടിയ ശേഷം കതക് തുറന്ന് അയാൾ ഒരു വശത്തേക്ക് ഒതുങ്ങി നിന്നു. മാർട്ടിനോ ആദ്യം ഉള്ളിലേക്ക് പ്രവേശിച്ചു. ആവശ്യത്തിനുള്ള സൗകര്യങ്ങളോടു കൂടിയ പ്രസന്നമായ ഒരു ഓഫീസ്. ഇരിപ്പിടത്തിൽ നിന്നും എഴുന്നേറ്റ് മേശയെ ചുറ്റി തന്നെ സ്വീകരിക്കാനെത്തിയ ആ ഓഫീസർ ഏതു ടൈപ്പ് ആണെന്ന് പെട്ടെന്ന് തന്നെ മാർട്ടിനോയ്ക്ക് മനസ്സിലായി. അല്പം കടുംപിടുത്തക്കാരനായ പഴയ തലമുറയിൽപ്പെട്ട ഒരു സാധാരണ ആർമി ഓഫീസർ... തീർച്ചയായും ഒരു നാസിയല്ല എന്ന് വ്യക്തം... ഓഫീസർ എന്നതിലുപരി തികച്ചും ഒരു മാന്യനും...
"താങ്കളെ കണ്ടുമുട്ടാനായതിൽ സന്തോഷം, സ്റ്റാൻഡർടൻഫ്യൂറർ..." ഉറച്ച ഹസ്തദാനമായിരുന്നെങ്കിലും സൗഹൃദഭാവത്തിന് കുറവില്ല. പക്ഷേ, അയാളുടെ കണ്ണുകൾ പറയുന്നത് മറ്റൊന്നായിരുന്നു. ഇതെല്ലാം പുറമെയുള്ള ഒരു ആചാര മര്യാദ മാത്രം...
"കേണൽ ഹെയ്ൻ..." കോട്ടിന്റെ പോക്കറ്റിൽ നിന്നും മാർട്ടിനോ തന്റെ SD കാർഡ് എടുത്ത് അദ്ദേഹത്തിന് നീട്ടി.
അത് പരിശോധിച്ച ശേഷം അയാൾ തിരികെ നൽകി. "ഇരുന്നാലും... എന്ത് സഹായമാണ് താങ്കൾക്ക് ഞങ്ങൾ ചെയ്യേണ്ടത്...? ഫെലിക്സ് നെക്കറെ താങ്കൾ പരിചയപ്പെട്ടുവല്ലോ... പാരീസിൽ നിന്നുമുള്ള ഒരു താൽക്കാലിക നിയമനമാണ്... എന്റെ സെക്കൻഡ് ഇൻ കമാൻഡ് ആയിട്ട്... അയാളുടെ അവധിക്കാലമെന്ന് വേണമെങ്കിൽ പറയാം... ഹോസ്പിറ്റലിൽ നിന്ന് അടുത്തയിടെ ഡിസ്ചാർജ് ആയതേയുള്ളൂ... റഷ്യൻ യുദ്ധനിരയിലായിരുന്നു..."
"അതെയോ...?" മാർട്ടിനോ ചോദിച്ചു. ശേഷം ഹിംലറുടെ അധികാര പത്രം പുറത്തെടുത്ത് അയാൾക്ക് നേരെ നീട്ടി.
സാവധാനം അത് വായിക്കവെ കേണൽ ഹെയ്നിന്റെ മുഖം വലിഞ്ഞു മുറുകി. അയാൾ ആ ലെറ്റർ നെക്കറിന് കൈമാറി. "താങ്കളുടെ ആഗമനോദ്ദേശ്യം എന്താണെന്ന് അറിയുന്നതിൽ വിരോധമുണ്ടോ...?"
"ഈ അവസരത്തിൽ അത് വെളിപ്പെടുത്താനാവില്ല..." നെക്കർ തിരികെയേൽപ്പിച്ച ലെറ്റർ വാങ്ങിക്കൊണ്ട് മാർട്ടിനോ പറഞ്ഞു. "എനിക്ക് വേണ്ടത് ഇത്ര മാത്രം... വേണ്ട സമയത്ത് നിങ്ങളുടെ സമ്പൂർണ്ണ സഹകരണം ഉണ്ടാകുമെന്ന ഉറപ്പ്..."
"അത് പിന്നെ പറയേണ്ട ആവശ്യമുണ്ടോ..." ഹെയ്ൻ ഒന്ന് സംശയിച്ചു. "പിന്നെ, താങ്കളുടെ താമസ സൗകര്യം... ഞാൻ കേട്ടത് ഡു വിലാ പ്ലേസിലാണ് താങ്കൾ തങ്ങുന്നതെന്നാണ്..."
"അതെ... വന്നയുടൻ തന്നെ പോർട്ടിൽ വച്ച് ക്യാപ്റ്റൻ മുള്ളറുമായി ഞാൻ സംസാരിച്ചിരുന്നു... നല്ല സഹകരണമാണ് അയാളിൽ നിന്ന് എനിക്ക് ലഭിച്ചത്... എന്റെ ആവശ്യത്തിന് ഒരു വാഹനവും അയാൾ ഏർപ്പാടാക്കിത്തന്നു... തൽക്കാലം വേറൊന്നും എനിക്കാവശ്യമില്ല... എന്റെ സാന്നിദ്ധ്യത്തെക്കുറിച്ച് ഇവിടെയുള്ള എല്ലാ യൂണിറ്റ് കമാൻഡർമാരെയും ഒന്നറിയിച്ചാൽ നന്നായിരുന്നു..."
"തീർച്ചയായും... പിന്നെ, ഒരു കാര്യമുണ്ട്..." ഹെയ്ൻ തുടർന്നു. "എനിക്കും സിവിൽ അഫയേഴ്സ് കമാൻഡർക്കും ഗ്വെൺസിയിലേക്ക് പോകേണ്ട ആവശ്യമുണ്ട്... ജനറൽ വോൺ ഷ്മെറ്റോയുമായുള്ള ഒരു വാരാന്ത്യ കോൺഫറൻസിന്..."
മാർട്ടിനോ നെക്കറുടെ നേർക്ക് തിരിഞ്ഞു. "എന്റെ ഊഹം ശരിയാണെങ്കിൽ നിങ്ങൾക്കായിരിക്കും ആ സമയത്ത് കമാൻഡറുടെ ചാർജ്ജ്...?"
"ശരിയാണ്..."
"എങ്കിൽ പിന്നെ പ്രശ്നമില്ല..." മാർട്ടിനോ എഴുന്നേറ്റ് തന്റെ ഹാറ്റ് കൈയ്യിലെടുത്തു.
"കോൺഫറൻസ് കഴിഞ്ഞ് തിരിച്ചു വന്നിട്ട് താങ്കളെ കാണാൻ സാധിക്കുമോ...?" ഹെയ്ൻ ആരാഞ്ഞു.
"മിക്കവാറും..." മാർട്ടിനോ അയാൾക്ക് ഹസ്തദാനം നൽകി. "നിങ്ങളെ പരിചയപ്പെടാനായതിൽ സന്തോഷം ഹെർ കേണൽ... നിങ്ങളുടെ ജോലികൾ നടക്കട്ടെ... എന്നെ യാത്രയാക്കാനൊന്നും ബുദ്ധിമുട്ടണമെന്നില്ല മേജർ..."
അദ്ദേഹം പുറത്ത് കടന്നതും വാതിൽ അടഞ്ഞു. ഹെയ്നിന്റെ അതുവരെയുണ്ടായിരുന്ന ഭാവം മാറിയത് പൊടുന്നനെയായിരുന്നു. "ഈ SS സേനാംഗങ്ങളെ കാണുമ്പോഴൊക്കെ എന്റെ ദേഹം വലിഞ്ഞു മുറുകുന്നു... എന്ത് നാശത്തിനാണ് അദ്ദേഹമിപ്പോൾ ഇങ്ങോട്ട് വന്നിരിക്കുന്നത് ഫെലിക്സ്...?"
"ദൈവത്തിന് മാത്രമേ അറിയൂ, ഹെർ കേണൽ... പക്ഷേ, അദ്ദേഹത്തിന്റെ രേഖകളൊക്കെ........." നെക്കർ ചുമൽ വെട്ടിച്ചു. "ഹിംലർ മാത്രമല്ല അതിൽ ഒപ്പിട്ടിരിക്കുന്നത്... സാക്ഷാൽ ഫ്യൂറർ തന്നെയാണ് കൗണ്ടർ സൈൻ ചെയ്തിരിക്കുന്നത്..."
"ഞാൻ ശ്രദ്ധിച്ചിരുന്നു..." ഹെയ്ൻ ഇരുകൈകളും ഉയർത്തി. "എന്തായാലും അദ്ദേഹത്തെ ഒന്ന് നിരീക്ഷിച്ചോളൂ... ഗ്വെൺസിയിൽ ചെന്നിട്ട് വോൺ ഷ്മെറ്റോയോടും ഇതേക്കുറിച്ച് അഭിപ്രായം ചോദിക്കുന്നുണ്ട്... തൽക്കാലം അദ്ദേഹത്തോട് നന്നായിത്തന്നെ പെരുമാറാൻ ശ്രദ്ധിക്കുക... ഹിംലറുമായി യാതൊരു പ്രശ്നവും നമുക്ക് വേണ്ട..."
"തീർച്ചയായും, ഹെർ കേണൽ..."
"ഗുഡ്... എന്നാൽ ഇനി ആ ഫുഡ് കൺട്രോൾ കമ്മിറ്റിയിലെ അംഗങ്ങളെ വിളിക്കൂ... അവരുമായിട്ടുള്ള മീറ്റിങ്ങ് ആരംഭിക്കാം..."
(തുടരും)
അടുത്ത ലക്കത്തിന് ഇവിടെ ക്ലിക്ക് ചെയ്യുക...
